Desh ke system ka pyramid

Apne desh mein jo sabse pratibhashali hote hain ve 12th karne ke baad IIT jaise sansthanon se engineering vagairah ki padhaai karne chale jaate hain. Jo inse kam pratibhashaali hote hain woh unmein compete nahi kar paane ke kaaran majboori mein graduation kar ke doosre competitive exams aur MBA aadi ke dwara IAS aur aise hi anya officers ya CEOs bante hain. Desh ke engineers desh ke nirmaan ke liye jo bridges, roads, metro rail etc. ke projects banate hain, ye officers unki jaanch karte hain aur unhe pass karte hain. Inse jo kam pratibhashaali hote hain ve MA, PHD ya LAW karte hain ya patrakaar bante hain. Ye gyaan, kaanoon, jantantrik prakriya jaise dando se vikaas ke kaamon mein rore atkaate hain. Jo inse bhi gaye- gujre hote hain ve neta ban jaate hain, jo thoda bahut vikaas ka kaam hua toh laal fite ko kainchi se kaatkar unka inaugration karne pahunch jaate hain. Aapko aashcharya hoga ki desh mein inse bhi gaye-bite log hote hain, jo bhai ya don ya aatanki ban jaate hain aur netaon ko ungliyon pe nachaate hain. Desh aise hi chalta hai...Pyramid ka sabse nichla bhaag sabhi upar waalon ka bojh ab tak nahi dhota toh yeh pyramid kab ka sad kar gir chuka hota. Is tarah ke examples aapko desh mein har jagah dikhaai de jaayeinge.

Mumbai attack ke baad

Mumbai attack ke 15 din guzar chuke hain. Yeh ek aisi ghatna thi jispar peechhe mudkar dekhna koi nahi chahega. Lekin dekhna padta hai kyonki na dekho, na socho toh log hamein kaayar samjheinge..kaheinge inki toh aise haadse jhelne ki aadat hai...aur ve kyon na samjhein aakhir 9/11 ke baad America mein ek bhi aisi aatankvaadi ghatna dohraayi nahi gayi jabki Bharat mein har mahine do mahine mein aise attacks hona aam baatho chuki hai . Vaise iss baar janjeevan saamaanya hone mein waqt lag raha hai...lagna bhi chahiye . Is baar Mumbai ke spirit ke naam pe log chup chaap kaam pe nahi jaa rahe. Is baar janta mein jo aakrosh hai woh pehle nahi dikha. Lekin sarkaar abhi bhi galti pe galti kiye jaa rahi hai. Bharat ne jamaat-ud-daava par pratibandh lagaane ki maaang ki, Pakistaan ne jhat maan liya...naam mein kya rakha hai...naam badal kar phir kaam shuru ho jaayega,Pakistan mein yeh bachche bachche ko maalum hai , Bharat sarkaar ko nahi maalum! Kargil yudh ke samay Atal Bihari Vajpayee ne Nawaz Sharif ko phone kiya tha. Nawaj Sharif ko Pakistani army ke is kuraafat ki koi jaankaari nahi thi. Is yudhh ke liye zimmedaar Musharraf ke satta sambhaalne ke kuchh hi mahinon ke bheetar Mr. Vajpayee ne unhe Hello mr. president keh kar phone kiya. Attack ke baad PM Manmohan Singh ne bhi Asif Ali Zardari se baat ki ki ISI chief ko bhejo....Pakistan ke zarre-zarre ko maalum hai ki Pakistan mein ISI ke upar Pakistan govt. ka koi control nahi hai lekin hamaare PM ko nahi maalum. Vishwa biradari se maang toh yeh karni chahiye ki Pakistan ko terrorist state ghosit kiya jaaye, na ki jamaat-ud-daava par pratibandh lagwaane jaise dikhaawe ki kaararwaai se santosh karke apni janta ko yeh kahne ki zaroorat hai ki dekho hamne dabaav daala tabhi toh yeh sab kuchh hua.... Masood Azhar ko ghar mein nazarband kar ke unhe tasty- tasty biryaani khila kar uske aaraam ka prabandh karne ke yeh Pakistani dhakosle se hamaari maasoom dikhne waali sarkaar santusht ho sakti hai, janta nahi.
Iss baar America ke tewar Bharat ki janta se jyaada mel kha rahe hain, Bharat sarkaar se kam. Woh iss baar Bharat ko samyam ka paath nahi padha raha. Senator John McCain ne pehle hi Pakistan ko saaf- saaf keh diya hai ki koi thos kaararwaai karo nahi toh Bharat attack kar sakta hai...President Obama ne bhi kaha hai ki aatank ke shikaar desh ko apni pratiraksha ke liye koi bhi kadam uthane ki aazadi hai. Ishaara saaf hai, agar Bharat koi aggressive step uthata hai toh America nahi rokega. Hum aisa soch sakte hain ki America ka yeh badla paintra mandi ko dhyaan mein rakh kar hai. Agar war hua toh weapons ka Bharat achchha kharidaar hoga aur America ko mandi se ubarne mein madad mil sakti hai, iss baat ko sire se nakaara nahi ja sakta...vaise bhi Afganistan se sena bula lene ka Obama ka bayaan aa chuka hai. So, Pakistaan ki zaroorat ab America ko utni nahi hai...aur agar hai bhi toh Pakistan America ke khilaaf hone ki himmat nahi juta sakta kyonki IMF ki funding se toh wah saans le paa raha hai...waise bhi nuclear war na chhide iske liye America ne Pakistan ke nuclear reactor ki security ke liye apne officials bhej hi chuka hai. Phir kya , America ka saaf ishaara Bharat sarkaar nahi samjhe aur kisi nirnaayak nateeze pe na pahunche toh sarkaar ko janta kabhi maaf nahi karegi.
Yeh toh baat hui attack ke baad raajnitik ghatnakram ki. Lekin saamaajik chhetra mein ek bahut achchhi baat dekhne mein aayi. Bakrid ke mauke pe shaayad hi koi aisi masjid rahi ho jisne muslim bhaiyon se tyohaar saadgi se manaane ki appeal na ki ho aur attack ki kade shabdon mein ninda na ki ho. Yeh ek saath islamic aur hindutwawadi, dono kattarpanthiyon ko jawaab tha. Pehla yeh ki koi yeh na samjhe ki islaam ke naam pe begunahon ke khoon karke Bharat ke musalmaanon ka samarthan paa lega. Doosra jawaab Hindutvavadi kattarpanthiyon ko ek baar phir yeh ki unke is aarop mein koi dam nahi ki Bharat ke musalmaan desh ki mukhyadhaara ke saath nahi hain.Sabse achchhi baat Aamir Khan ne kahi ki," aatankvaadiyon ka hausla isliye jyaada badhta hai ki hum unse baat karte hain, samjhauta karte hain...kal ko kisi ne mujhe ya mere parivaar ko bandhak banaya toh mujhe chhudaane ke liye sarkaar aatankvaadiyon se samjhauta na kare...desh hit mein unhe sabak sikhaye." Yeh statement dekar Aamir Khan ne yeh bata diya ki ve sirf apni filmo mein deshbhakti ki kasamein nahi khaate , haqeeqat mein bhi wo jo karte hain uspar believe karte hain....iss baat ke liye Amir ki jitni prashansha ki jaaye, kam hai. Aakhir mein hum ATS chief shahid Hemant Karkare ki dharmpatni ke us aatmsammaan aur khuddaari se bhare faisle ko kaise bhool sakte hain jo unhone Gujraat sarkaar dwaara diye gaye ek crore rupaye ki sahaayata raashi bina ek pal kuchh soche lauta di aur saaf- saaf bataa diya ki Bharat ke sachche sipahi ki shahaadat anmol hai.Aise jazbe ko sau-sau baar salaam!