Slumdog millionaire ke music ke liye A.R. Rehman ko British Academy of Film and Telivision Arts mein nominate kiya gaya hai….A.R.Rehman ko milakar iss film ko gyarah categories mein nomination haasil hua hai…Bafta ke liye iss nomination ke saath hi Golden Globe award jeet kar abhi – abhi laute A.R.Rehman ko yeh lagaataar doosri uplabhdhi haasil hui hai … aaiye daalte hain A.R.Rehman ki uplabdhion par ek nazar…
Slumdog millionaire film ka yehi wo song hai jisne Golden Globe award jeet kar aur Bafta ke liye nominate hokar Indian music ka loha poori duniya se manwaaya hai …. 1980 ke dashak mein Madras ke Nemesis Avenue naam ke ek rock group mein Dilip naam ka ek ladka thoda western, thoda folk, thoda Indian classical music ke fusion se ek naye sur ko saadh raha tha. Uski yeh saadhna Nabbe ke dashak mein tab rang laayi jab Maniratnam ki film Roza release hui…aur iske sangeet ne saalon se, ek hi leek par chali aa rahi mukhda- antara-mukhda ki parampara ko tod diya…aur Indian film industry ne mausiki ki duniya mein ek vilakshan pratibha ko pehchana …wo Dilip A.R. Rehman ban ke saamne aaya …
Roza ke sangeet ne na keval Bharat mein dhoom machaaya balki aage chal kar antarrashtriya star par bhi -dil hai chhota sa - gaane ko shataabdi ke sarvshreshth geeton mein se ek maana gaya…Iske baad A.R. Rehman ke sangeet ke aage awards chhote nazar aane lage…chaar baar National Award aur gyarah baar Filmfare Award aur ab Golden Globe jeet chuke iss“ Madras ke Motzart “ ne apne sangeet mein har star par experiment kiya. DIL SE ke chhaiya- chhaiya gaane mein seven stages of Sufism ko mausiki mein dhaal kar duniya ko bataa diya ki ve kitni door ke safar ke raahi hain…
Hamesha fresh voice aur alag sound track ki khoj mein rehne waale A.R. Rehman ne iss baat ko bhi jhhuthla diya ki Bharat mein sabse popular music filmi music hai…Unhone filmo se hath ke bhi jo kaam kiya , uska jaadoo logon ke sar chhadh kar bola…chhahe wo ma tujhe salaam ho ya kisi mobile service ka signature tune… humari shubhkaamnaayein yahi hai ki A.R.Rehman Bafta mein apne sur ki dhaak jama kar ek hafte baad Oscar ke liye bhi nominate hon…aur wahaan bhi inki jai ho!
Subscribe to:
Post Comments (Atom)
2 comments:
sir ji aapako asly baat bhi likhani chahiye ki kyu videshi logo ko bharatiya filmo ke prati itanaa pyar umad rahaa hai,,, slum dog koi itani bhi achhi film nahi hai,, rahmaan kaa music bhale hi achha ho par film itani achhi nahi ,,, jaise kuchh saalo pahale miss univers aur miss world pratiyogita main bharatiy sundariyo ko jitayaa jaa rahaa tha,,,, sir ji jaraa detail main asli baat bhi likhiye,,,,
JAI HO !!!!!!
It is written. Plz see below. Thanks
Post a Comment